台語有音無字？◎鄭詩宗。

台語（Holo話，福佬話）是台灣上濟人使用e本土語言，有超過一千五百萬人人會曉聽會曉講。M－閣若是講到讀台語、寫台語，足濟人就霧－sa－sa，僥疑講台語甘有字？甚至有人講台語干單有聲音無文字。

事實上台語不但有字，甚至比英語、華語（中國話、北京語）閣卡濟字，卡濟套文字。大家攏知，英語有文字，是對羅馬流傳落來，叫做羅馬字（就是ABC）。中國語（簡稱作中語）也有字，叫做漢字。羅馬字世界通用，全地球的語言有80％以上攏使用羅馬字。漢字難寫難學，才只有10－e語言在使用。台語不但自古以來就有漢字，照“台語常用字字典”有超過5萬字。台語閣有台灣字（也稱呼為白話羅馬字）e詞典、小說、散文、劇本、醫學教科書、新聞報紙、雜誌等等窮盡一世人也讀不完e文字。台語e羅馬字比漢字數量卡濟，卡好使用，流傳卡遠卡闊。

近代語言學者對文字e5研究主要e重點是探求一個人讀書看字e時候，如何在大腦引發思考、啟動認知。他們發現漢字以具體意象為主，無法引發抽象思考，無法激發創造力。甚至有Hawaii大學學者主張，東方使用漢字e國家譬如日本、韓國、中國、台灣e人民，普遍有組織能力，不過無創造力是因為從小讀漢字看漢字e結果。

咱台語不止有意象具體e漢字，還有抽象音素e羅馬字，是咱台灣人e寶貝。甚麼人講台語無文字！

（作者為高雄醫學大學台語文教師） .....2005-05-06【台灣日報】